LILOAN, CEBU-Nagbuy-od sa kaugalingong dugo ang usa ka lalaki nga napalgang patay sulod sa iyang apartment sa lungsod sa Liloan, amihanang Sugbo gahapong adlawa, Hulyo 17, 2024.
Giila ang biktima nga si Petronilo Maglasang, usa ka miyembro sa LGBT.
Sa pakighinabi sa Bombo Radyo Cebu kang Police Major Eric Gingoyon, ang hepe sa Liloan Police Station, nga dili pa nila matino kung asa nga bahin sa lawas sa biktima ang nasamdan ug misangpot sa grabe nga pagdugo gumikan kasamtangan pa nga nagpaabot sa resulta sa gipahigayon nga autopsy aron sa pagdeterminar sa hinungdan sa kamatayon ni Maglasang.
Gisaysay usab ni Gingoyon nga nakadawat sila og taho nga ulahing nakit-an ang biktima nga kauban sa giingong uyab niini nga lalaki ug padayon ang ilang imbistigasyon aron sa pag-ila sa maong indibidwal.
Sa pikas bahin, duha ka lalaki patay human nga nadisgrasya sa dalan sa Brgy. Poblacion, Liloan, Cebu.
Diin ang drayber sa motorsiklo nga si Edgardo Tambago, namatay samtang gitambalan ang iyang mga nahiaguman nga samad ug ang backrider niini ug katrabaho nga si Jerwin Belamia kay wala makaabot sa tambalanan.
Basi sa inisyal nga imbistigasyon sa kapulisan nga gikan sa fiesta ang mga biktima sa Carmen, Cebu ug posibleng nakainom usab nga mipauli paingon sa ilang boarding house sa Lapu-Lapu.
Hinungdan nga gipahimangnoan ni Gingoyon ang mga motorista ug mga residente sa lungsod sa Liloan nga magbinantayon ug mag-amping kanunay hilabi na ning panahon sa ting-uwan.
