Sikop sa mga sakop sa National Bureau of Investigation – Cebu District Office ang usa ka mahuyang human kini maaktuhi nga migamit sa pangalan sa mga kongresista ug mga ahensiya sa gobyerno aron mangilad sa mga nangita ug financial assistance atol sa usa ka entrapment operation nga nahitabo niadtong Oktubre 14, 2026.
Ang suspek giila nga si Christian De Asis, hamtong ang panuigon, residente sa Mandaue City diin siya nadakop base sa reklamo nga nadawat sa mga sakop sa NBI-CEBDO gikan sa opisina ni Mandaue City Lone District Congresswoman Emmarie ‘Lolypop’ Ouano-Dizon.
Matud pa ni Arnel Pura, pangulo sa NBI-CEBDO, gikataho nga nagpakarung-ingnon si De Asis, nga representative ni Kongresista Lolypop Ouano-Dizon ug moduol sa mga pasyente sa ospital diin siya mopresentar nga motabang kanila aron makakuha og financial assistance ug scholarships bugti sa paghatag og kwarta alang sa processing ug sa travel expenses sa suspek.
Apan dili authorized representative o empleyado sa buhatan ni Ouano-Dizon si De Asis. ug dugang pa, nagpakarung-ingnon usab ang suspek nga representate ni Cebu 6th District Congresswoman Daphne Lagon, ug sa uban pang mga ahensiya sa kagamhanan.
Gawas sa reklamo sa opisina ni Ouano-Dizon, midangop usab sa NBI-CEBDO ang lain pang upat ka mga reklamante nga nabiktima sa maong suspetsado. Usa sa biktima mao si Gardenia Aveola iyang gikabutyag nga miduol kaniya ang suspetsado nga si De Asis isip representante ni Congresswoman Daphne Lagon aron motabang sa pagpiyansa sa gidakop niya nga anak sa CIDG.
Matud pa ni Aveola, dul-an sa PHP 100,000 ang nadagit sa suspek gikan kaniya.
Atol sa pagpresentar ni De Asis ngadto sa mga tigbalita, iyang giangkon ang mga pasangil batok kaniya ug nangayo siya og pasaylo sa mga nabiktima niya hilabi na sa opisina ni Kongresista Lolypop Ouano-Dizon. Matud pa ni De Asis nga nagasto na niya ang kwarta ug nagmahay siya sa iyang nabuhat nga krimen.
Kasong complex estafa with impersonation of authority ang ipasaka batok kang De Asis, diin anaa karon sa kustodiya sa NBI-CEBDO.
Sa pikas bahin, nanawagan si Pura sa katawhan nga magmatngon hilabi na sa mga tawo nga nagpakarung-ingnon nga representante sa mga politiko o sa mga ahensiya sa kagamhanan aron di mabiktima sa pagpangilad.
Dugang pa, miabiso sab ang buhatan ni Congresswoman Lolypop Ouano-Dizon nga ang tanang mga transaksyon sa financial assistance sama sa medical assistance ug scholarship mahitabo lamang sa buhatan sa Kongresista nga nahimutang sa Mandaue City Sports Complex
