Pipila ka mga bisita sa usa ka resort sa Davao Oriental ang nakuratan ug nahadlok nga maligo sa dagat sa dihang ilang nakita nga adunay mga ulod sa balas ug ang uban usab naglutaw sa baybayon.
Sa video nga mikatap online, nakita nga nagkatag sa baybayon ang morag seaweeds o rubber bands.
Apan sa mas duol nga pagsusi, kini naglihok nga adunay sagol nga brown ug asul nga mga kolor.
Wala dayon nagpagawas ug pahayag ang mga lokal nga mga opisyal kabahin sa insidente.
Apan matod sa pipila ka mga eksperto, posibleng dunay mga palolo worm nga nakita sa baybayon.
Ang mga ulod sa palolo kasagarang makita sa tropikal nga mga rehiyon sa Asia ug Pasipiko.
Giingong normal lang nga maanod sa baybayon ang palolo worm sa panahon sa breeding tungod kay kabahin kini sa ilang pamaagi sa pagsanay o mass spawning.
Sa pipila ka mga dapit, ang palolo worm giingong gikaon o gihimong delicacy ug taas ang presyo niini kay panagsa ra kini makita sa dagat.
Ang mga ulod nga palololo boluntaryo usab nga mawala sa baybayon kung mahuman na ang ilang buluhaton sa pagpanganak.
