Gihagit ni ACT Teachers Partylist Rep. Antonio Tinio ang Palasyo sa Malacañang nga mahimong ibutyag ang bahin sa tinuod nga kahimtang sa panglawas ni Presidente Ferdinand “Bongbong” Marcos Jr.
Gihimo sa magbabalaod ang pahayag, pipila ka semana human na-confine ang presidente tungod sa diverticulitis nga usa ka komon nga klase sa sakit sa digestive system.
Sa usa ka interbyu sa Bombo Radyo sa magbabalaod, iyang giawhag ang Palasyo nga mahimong bukas ug ipasabut sa publiko ang tinuod nga kahimtang sa panglawas ni Pang. Marcos tungod kay matud niya nga katungdanan kini sa Malacañang.
Giingon usab niya nga ang publiko adunay katungod nga mahibaw-an kung ang president kay ‘fit’ nga magpadayon isip lider sa nasud ug kung makahimo pa ba siya og mga desisyon nga may kalabotan sa iyang trabaho isip presidente sa nasud.
Giinsistir ni Tinio nga ang pisikal ug mental nga kahimtang sa panglawas sa presidente kinahanglan nga bukas sa publiko tungod kay wala kini masakop sa iyang ‘right to privacy,’ isip lider sa nasud.
Giawhag usab sa magbabalaod sa Makabayan bloc nga ang Palasyo nga dili itago ang tinuod nga diagnosis o ang mga nahibal-an sa mga doktor sa dihang na-confine siya sulod sa pipila ka adlaw diin namatikdan sa publiko ang pagkunhod sa timbang sa presidente.
Kahinumduman nga niadtong gabii sa Enero 21, si Pres. Marcos Jr. gibutang ubos sa medikal nga obserbasyon human siya nakasinati og sakit sa tiyan.
Niadtong Enero 26, gitaho sa Malacañang nga ang lider sa nasud mibalik na sa normal nga trabaho, ug ang iyang kondisyon kay miarang-arang na.
