Gibasura sa Office of the President ang kasong administratiba nga gisang-at ni dismissed Cebu City mayor Michael Rama batok kang Cebu Governor Gwendolyn Garcia tungod sa giingong supak sa balaod nga pagpagawas niini og memorandum nga nagmando sa pagpahunong sa pagtukod sa CBRT Project sa mga lote nga gipanag-iya sa Kapitolyo sa Osmeña Blvd ning dakbayan sa Sugbo.
Diin ang mga akusasyon nga gilabay ni Rama sa Gobernador kay lakip ang Oppression, Grave Misconduct, Abuse of Authority, Conduct Prejudicial to the Best Interest of the Service, Violation of Code of Conduct and Ethical Standards for Public Officials and Employees, ug Section 3 (e) of Anti -Graft and Corrupt Practices Act nga may kalabotan sa Administrative Order No. 23 series of 199.
Basi sa dokumento, gibasura sa Malacañang ang mga reklamo ni Rama tungod sa kakuwang sa igong ebidensiya sa pagpasaka sa trial.
Kahinumdoman nga niadtong Marso, si Rama nisang-at og administratibong reklamo atubangan sa Office of President Ferdinand Marcos Jr. batok kang Garcia human ang gobernador niluwat og cease-and-desist order sa CBRT project tungod sa heritage concerns.
Hinungdan nga mitumaw ang kasungian tungod sa pagsupak sa Kagamhanan sa Probinsiya sa Sugbo sa katukoran sa CBRT subay sa Osmeña Boulevard.
Kung kahinumdoman, si Gwendolyn Garcia niinsister nga ang Probinsya sa Sugbo maoy nanag-iya sa Osmeña Boulevard ug sa palibot niini gikan sa Cebu Capitol Building hangtod sa Fuente Osmeña Rotunda.
Human sa resulta sa land swap deal tali sa Cebu Provincial Government ug Cebu Heights Inc. niadtong 1930s.
