Subling gipasabot sa Malacañang nga walay politikanhong pagpanghilabot sa paglusad sa 20/kilo nga bugas nga programa sa gobyerno.
Kini ang tubag sa Palasyo human gikuwestiyon ni Bise Presidente Sara Duterte ang timing sa proyekto pipila ka semana sa dili pa ang midterm elections.
Matud ni Palace Press Officer Claire Castro nga ang pag-apod-apod sa subsidy alang sa baratong bugas wala gibase sa eleksyon kon dili sa panginahanglan sa mga lungsoranon, ilabi na niadtong anaa sa kadaplinan sa katilingban.
Dugang ni Castro, walay “timing” ang paghatag og hinabang.
Gipasabot usab ni Castro nganong wala dayon mapatuman ang maong programa human sa saad sa kampanya sa Presidente sa 2022 Presidential election tungod kay gikinahanglan ang saktong pagtuon ug koordinasyon tali sa nasudnong kagamhanan ug lokal nga kagamhanan.
Samtang, ang Palasyo nipasalig nga ang programa molungtad hangtod sa Disyembre ning tuiga, samtang sa sunod tuig plano niini nga iapil ang programa sa nasudnong budget aron maseguro ang pagpadayon sa proyekto sa 2026.
Gikanayon usab sa Department of Agriculture nga ang halin sa bugas nga tag 20 pesos matag kilo magsugod sa Mayo 1, samtang sa Mayo 2 sa KADIWA center sa Bureau of Animal Industry sa Quezon City.
