Gihimakak sa Malacañang ang mga espekulasyon nga naglambigit sa desisyon sa Korte Suprema nga pag-abswelto kang kanhi First Lady Imelda Marcos ngadto sa pagpili ni Presidente Ferdinand Marcos Jr. sa sunod nga Chief Justice.
Matod ni Presidential Communications Office Undersecretary Claire Castro, walay basehanan sa kamatuoran ang mga pag-angkon nga naglambigit sa maong desisyon ngadto sa tulo ka mga Supreme Court Justices nga lakip sa mga posibleng mopuli kang Chief Justice Alexander Gesmundo.
Lakip sa mga Justice nga mipirma sa desisyon mao sila si Associate Justices Ramon Paul L. Hernando, Henri Jean Paul B. Inting, ug Rodil V. Zalameda.
Gipasiugda ni Castro nga ang paglambigit sa maong desisyon ngadto sa proseso sa pagpili sa Presidente nagpakita og kakulang sa pagtahod sa kagawasan o independence sa Korte Suprema.
Gipahayag usab sa opisyal sa Palasyo nga gitahod sa Administrasyon ang awtoridad sa Korte Suprema isip kataposang maghuhukom sa mga legal nga panagbangi, subay sa separation of powers.
Niadtong Hunyo 10, 2026, gibaliktad sa Korte Suprema ang desisyon niadtong 2018 nga nagkondena kang Imelda Marcos sa pito ka ihap sa kasong graft, human nakita sa korte nga napakyas ang prosekusyon sa pagpamatuod sa iyang sala nga beyond reasonable doubt.
Lakip sa mga punto nga gihatagan og gibug-aton sa korte mao ang kapakyas sa pagpamatuod nga ang mga Swiss foundation nalakip sa sakop sa Anti-Graft and Corrupt Practices Act, ingon man ang mga isyu bahin sa pagpamatuod sa authentication sa mga importanteng dokumentaryong ebidensya.
