Gipakatap ang kapin sa 8,000 ka mga polis ug security personnel sa tibuok Dakbayan sa Sugbo atol sa usa ka semana nga selebrasyon sa Sinulog 2026, nga malinawong natapos niadtong Dominggo, Enero 18.
Matod sa Police Regional Office sa Central Visayas (PRO-7), nagmalamposon ang ilang security plan nga naglangkob sa tanang dagkong kalihukan sa Fiesta Señor .
Ang maong mga personahe gikan sa nagkadaiyang ahensya sama sa, Philippine National Police (PNP), Armed Forces of the Philippines (AFP), Bureau of Fire Protection (BFP), Bureau of Jail Management and Penology (BJMP), Naval Forces Central, Intelligence units, ug uban pang partner agencies.
Gawas sa mga otoridad, dako sab og natabang ang mga force multipliers, criminology interns, ug mga volunteers sa komunidad aron masiguro ang kahapsay sa 4.3 kilometros nga rota sa Sinulog Grand Parade nga gidagsa sa gibanabanang 5.2 ka milyon ka tawo.
Gikabutyag usab ni Police Brigadier General Redrico A. Maranan, ang Regional Director sa PRO-7 ug pangulo sa “Task Force Fiesta Señor,” nga ang sayong pagpangandam ug ang “layered security” maoy yawe sa malinawong kapistahan.
Diin, gigamit sab sa kapolisan ang ilang mobile command vehicle alang sa real-time nga koordinasyon, CCTV monitoring, ug intelligence-driven deployments aron madumala ang dagan sa trapiko ug density sa katawhan.
Bisan pa man og adunay mga ginagmay nga report sama sa mga bata nga nahanaw ug mga medical concerns, mapasalamaton ang CCPO ug PRO-7 tungod kay walay natala nga major crime, stampede, o security breach.
