Nagkasinabot ang mga nanag-iya og mga malls ug mga establisimento sa dakbayan sa Sugbo nga maghiusa aron malikayan ang mga kawatan ug tulisan.
Kini ang nahimong pamahayag ni Cebu City Mayor Edgardo Labella human nakig-meeting sa mga mall operators, kauban ang mga sakop sa Cebu City Police Office (CCPO).
Kahinumduman nga nagpatawag si Labella og meeting sa mga nanag-iya og malls ug ni City Police Director Colonel Gemma Vinluan alang sa mga security engagements human sa robbery incident sa J Center Mall, Mandaue City.
Matud ni Labella nga preparado ang mga dakong malls, ilabi na dapit sa Brgy. Mabolo, kung pagpatuman na sa hugot nga seguridad ang hisgutan.
Gihimug-atan sa mayor nga kinahanglang adunay mag-monitor sa mga CCTV footages aron makaresponde dayon ang otoridad kung adunay mga makadudahong lihok.
Kinahanglan usab, matud pa, nga pagamiton ang mga security guards og mga high-powered ug maayong klase sa armas.
Gihatagan usab og importansya ni Labella ang hugot nga seguridad ilabi na nga nagkaduol na ang panahon sa Pasko, bag-ong tuig, ug kapyestahan ni Senior Sto. Niño.
Misugyot usab si Labella nga pabutangan og artificial intelligence technology aron mabantayan ang mga suspicious nga linihokan sa mga kadalanan ug publiko nga lugar.
CRISIS MANAGEMENT
Gihimug-atan sa Cebu City Police Office (CCPO) nga nagpabiling proactive ang mga sakop niini sa crisis management aron malikayan ang mga insidente sama lang sa pagpangawat ug pagpanulis.
Matud ni City Police Director Colonel Gemma Vinluan, nga nagpahigayon sila og simulation exercises sa mga hotels, malls, ug uban pang mga establisimento.
Gihingusgan ni Vinluan nga angayan pang pakusgan ang seguridad sa entrance area sa mga malls ug pagbutang sa CCTV cameras aron mabatukan ang mga dautang elemento.
Misugyot usab ng city director nga mas maayong pasudlon na lang ang mga nagpatrolyang pulis nga naka-uniform sa mga malls.
Dugang pa ni Vinluan nga imbes nga i-deposit ang armas sa mga uniformed police personnel, ID na lang ang ihatag sa security aron makadala og armas atol sa pagpatrolya.
Nanghinaut ang city police director nga magtinabangay ang mga nanag-iya og mga establisimento sa mga sakop sa kapulisan subay sa pag-intensify sa ilang seguridad.
