CENTRAL VISAYAS-Gibutyag ni Comelec Cebu Province spokesperson, Omar Sharif Mamalinta, nga pabor ang pipila ka mga Sugbuanon sa ipatuman nga mall voting alang sa umaabot nga Barangay ug SK elections.
Gipahibalo ni Mamalinta nga aduna na’y 12 ka mga malls ang nagpakita og suporta mahitungod niini ug kung gani magmalampuson, plano sa Comelec nga ipadayon ang mall voting hangtud sa 2025 national elections.
Apan giklaro niini nga mag-depende ang pagpatuman sa mall voting sa mga opisyal sa barangay kung asa nahimutang ang mga establisimento.
Gidugang pa ni Mamalinta nga wala sila’y ipagawas nga pondo sa maong pamaagi gumikan kay mismo na ang mall mugasto niini.
Usa ka semana sa wala pa ang filing period sa certificate of candidacy karung Agosto 28 ngadto na sa Setyembre 2 alang sa mga modagan sa Barangay ug SK elections, hingpit na kini nga gipangandaman sa Commission on Elections.
Gipahinumdom ni Mamalinta ngadto sa mga kandidato ang mga ginadili nila nga buhaton sulod sa 10-day campaign period, sugod October 19 hangtud sa October 28, lakip na ang pagsunod sa gidak-on sa campaign materials ug ang paggasto sa mga kandidato nga basi lang sa nakalatid sa balaud.
