COTABATO CITY- Giimbestigahan sa mga otoridad ang pagpusil patay sa usa ka mabdos sa Cotabato City.
Giila ni Station 2 Commander PCapt.Teofisto Ferrer Jr. ang biktima nga si Jacquelyn Bendijo Petiza, 28-anyos nga residente sa Barangay Macaguiling, Sultan Kudarat, Maguindanao del Norte.
Base sa imbestigasyon, naglakaw ang biktima dihang gipusil sa wala mailhing mamumuno sa may dalan Melendrez, Barangay Rosary Heights 10, dakbayan sa Cotabato.
Naigo sa ulo ang biktima hinungdan sa hinanaling kamatayon niini.
Narekober sa crime scene ang usa ka kabhang sa kalibre .9mm nga armas nga gituohang maoy gigamit sa pagpatay.
Gisusi sa kapolisan ang posibleng love triangle nga motibo sa krimen.
Nakuha usab sa mga otoridad ang CCTV footage sa lugar aron makatabang sa pag-ila sa suspek.
Gipahugtan na usab ang seguridad sa maong dapit nunot niining ulahing insidente sa pagpamusil.
