CEBU CITY-Gidala na ang patayng lawas sa managsoun human nga na-trap sa miulbo nga sunog sa Barangay Poblacion, lungsod sa Sibonga.
Giila ang mga biktima nga sila si Kyle Dominic Geronimo, 25 anyos, ug iyang maguwang nga si Fernando Geronimo, 26 anyos.
Sa pakighinabi sa Bombo Radyo Cebu News Team ngadto kang SFO1 Japeth Alegrado, ang fire investigator sa Sibonga Fire Station, na ang balay gipanag-iya sa iyaan sa mga biktima nga si Minerva Burgos, 51 anyos.
Matod pa ni Alegrado nga nagsugod ang sunog sa lawak sa mga biktima hinungdan nga natanggong sa sulod sa lawak ang duha ka magsuon sanglit gitrangkahan kini ug dili na sila makagawas.
Dugang niini, posibling hinungdan sa sunog mao ang kandila nga wala ma bantayi sanglit adunay brownout dihang nahitabo ang maong insidente.
Gibanabana usab nga mokabat sa P267,000 ang danyos sa maong sunog.
