CEBU CITY-Maningkamot nga makab-ot ang target nga timeline sa management team sa Cebu Bus Rapid Transit (CBRT) bisan paman adunay issue ang skywalk kabahin sa ownship niini tabok sa Cebu Normal University (CNU) ug sa skywalk duol sa Fuente Osmeña Circle sa Osmeña Blvd., nga kinahanglang gub-on aron mahatagan og dalan ang proyekto.
Nihangyo ang manager sa CBRT nga si Norvin Imbong ngadto sa Cebu City Council nga mopalabang og resolusyon alang sa City Government nga maoy manag-iya sa duha ka skywalk ug imando ang ilang demolisyon.
Apan, pipila ka mga lokal nga magbabalaod niingon nga mahimong mapasakaan og kaso ang konseho kon mosugot kini sa hangyo ni Imbong.
Ang konseho, pinaagi sa mosyon nga gipresentar ni City Councilor Rey Gealon, nihangyo sa City Legal Office (CLO), Department of Public Works and Highways (DPWH), ug Commission on Audit (COA) nga mohatag og legal nga opinyon kalabot sa maong butang.
Mipadayag si Imbong nga iyahang hangyoon ang kontraktor nga ipadayon ang ubang trabaho sa CBRT samtang naghulat pa sa pag-aprobar sa pagguba sa mga skywalk.
Target nga makompleto ang Package 1 sa CBRT project sa kataposang quarter sa 2023.
