Nasuta nga anaa sa “poor condition” ang kahimtang sa Mandaue City Abattoir nga nahimutang sa Barangay Labogon sa maong dakbayan human giinspeksyon sa kampo sa umaabot nga bag-ong administrasyon ni Mayor-Elect Thadeo “Jonkie” Ouano niadtong Huwebes, Hunyo 26, 2025.
Ang maong pag-inspeksyon kay gipangulohan ni Incoming City Administrator Atty. Sally Malig-on isip kabahin sa nagpadayong transition process sa kagamhanag dakbayan sa mga city-run facilities lakip ang maong lapaanan sa babot sulod sa dakbayan.
Matod ni Atty. Malig-on nga sa ilang pagbisita kay nasuta nila ang dili maayong kahimtang sa maong pasilidad nga nanginahanglan na og repair ug improvement.
Gani dugang niini nga pipila ka katuigan na ang milabay sukad nga inisyal nga naguba kini niadto pang pag-igo sa Bagyong Odetter pag Disyembre 2021 nga hangtod karon padayong kini nagkaguba og wala hatagi og pagtagad.
Gani nakadawat sab sila og report nga mibalik sa manu-manong proseso sa paglapa sa baboy ang maong pasilidad human wala na nakabalik sa karaang rating niini nga Double “A” standard sa mechanized processing aron unta sa limpyo ug episyente nga paglapa sa karneng baboy.
Gihimug-atan sa opisyal nga importante ang ilang gibuhat nga assessment sa kondisyon sa mga pasildad sa dakbayan dili lamang sa pagsuta sa kahimtang niini karong transition period apan sa malungtarong pagsulbad sa mga problemang giatubang sa umaabot bag-ong administrasyon.
