CEBU – Mikabat sa P1.2-million ang danyos sa nahitabong sunog sa Sitio Paradise, Barangay Looc, dakbayan sa Mandaue, kagabii, Nobyembre 22.
Sa maong sunog, gibana-bana nga mukabat sa dul-an 800 ka mga panimalay ang naugdaw, diin kapin sa 3,000 ka mga indibidwal ang apektado.
Gibutyag ni Camilo Basaca, Jr., ang officer-in-charge sa Mandaue City Social Welfare and Services (CSWS), nga padayon ang ilahang paglista karun sa mga biktima sa sunog ingon man ang paghatag ug assistance sa mga nasunogan, sama na lang sa paghimutang sa mga biktima sa City Central School sa Mandaue, ingon man ang paghatag ug mga hot meals.
Matud pa, kutob lang sa tulo kaadlaw ang ilahang paghatag ug pagkaon sa mga biktima ug human niini giingong i-turnover na kini ngadto sa barangay.
Apan gitino ni Basaca nga dili sa gihapon nila biya-an ang barangay ug magpadayon ang ilahang mga logistical support.
Sa pagkakarun, gipahibalo sa naasoy nga CSWS official nga nagkinahanglan ang mga biktima ug mga sanina, ingon man ang uban pang mga basic necessities.
Samtang, gitino usab ni Mandaue City Mayor Jonas Cortes nga dili na kinahanglan ang pagdeklarar ug state of calamity subay sa nahitabong sunog gumikan kay usa lang ka sitio ang apektado.
Hangyo lang sa mayor nga mahimong matinud-anon sa pagpalista ngadto sa CSWS alang sa ilahang assistance ug dili gayud mulakip ang kadtong mga dili tinuod nga biktima sa sunog.//
