Mipasar og resolusyon ang konseho sa Kagamhanang Dakbayan sa Mandaue nga nag-awhag sa Department of Environment and Natural Resources (DENR), Department of Science and Technology (DOST), ug sa Cebu City Disaster Risk Reduction and Management Office (CCDRRMO) alang sa pag-instalar og Early Warning System (EWS) ang tibuok gitas-on sa Butuanon River.
Ang jurisdiction sa maong suba kay mulanat pa sa bukirang bahin sa dakbayan sa Sugbo diin nagtunga kini sa dakbayan sa Mandaue ang downstream flow na niini.
Sumala pa ni Mandaue City Councilor Atty. Carlo Fortuna na nindot kini nga sugyot nga balaudnon aron sa paghatag og higayon nga makahibalo ug makaandam ang anaa sa ubos nga dapit sa suba nga hilabihang apektado sa mga hulga sa pagbaha.
Dugang pa nga aprobado sab sa ilang konseho ang laing resolusyon nga nag-awhag sa National Telecommunications Commisssion (NTC) nga pagamiton ang Mandaue City Disaster Management Office sa paggamit sa Emergency Broadcast System sa NTC aron paspas nga mapadayag ang warning and evacuation advisories.
Gani sa pikas bahin, mipahayag sab si Cebu City Councilor Dave Tumulak, ang Chairman sa Committee on Disaster Risk Reduction Management sa Cebu City Council atol sa eksklusibong pakighinabi niini sa Bombo Radyo Cebu Newsteam nga makiangayon ang maong sugyot ilabi na nga ang bunok sa uwan sa bukirang dapit nga hilabihang maka-apekto sa mga komunidad sa ubos nga bahin sa suba.
Ang maong lakang balaudnon sa konseho sa dakbayan sa Mandaue kay nunot sa grabeng pagbaha nga nasinati niadtong Agosto 15 nga nakapabaha sa dakong bahin sa syudad ilabi nagpalibot sa Butuanon River.
