Gihangyu sa Mandaue City Police Office (MCPO) ang City Government nga mopalit og mga lote nga katukoran sa mga stand-alone nga edipisyo alang sa Police Stations 3 ug 5, nga kasamtangang nagoperate sa gawas sa mga barangay hall sa Basak ug Opao.
Gipangulohan ni MCPO City Director Police Colonel Cirilo Acosta, ang paghatud sa maong tuyo atol sa courtesy visit niini ngadto kang Mayor Thadeo “Jonkie” Ouano.
Gihimug-atan niini ang panginahanglan alang sa tukma nga mga pasilidad sa pulisya, ingon nga ang pagsiguro sa yuta mao ang una nga lakang. Ang MCPO nangayo og tabang sa dakbayan sa pagpangita og mga lote nga dili mominus 400 square meters diin ang Philippine National Police (PNP) makatukod og mga permanenteng pasilidad alang sa Stations 3 ug 5.
Nagpadayon sa pag-operate ang Station 3 sa Barangay Basak ug Station 5 sa Barangay Opao sa gawas sa mga luna sa barangay hall nga dili orihinal nga gidisenyo alang sa mga operasyon sa kapulisan.
Samtang, bisan og adunay kaugalingong edipisyo ang Station 1 sa Barangay Centro apan kuwang gihapon kini sa mga sumbanan nga gitakda sa National Police Commission (Napolcom).
Matud usab ni Acosta nga ang mga estasyonan nga nahimutang sulod sa mga pasilidad sa barangay hagip-ot na kaayo alang sa epektibong pagpapolis, uban sa mga makeshift setup nga dili na angay alang sa saktong operasyon labi na sa pagdumala sa mga piniriso ug pagproseso sa mga rekord.
Nanghinaut ang MCPO nga malakip sa siyudad ang pagpamalit sa luna sa budget sa sunod tuig, sanglit dili man kini kabahin sa appropriations karong tuiga. | Bombo Nathaniel Sandoval
