Giablihan na ang gikahinam-hinam nga City Food Park sa dakbayan sa Mandaue kagahapong adlawa sa Huwebes, Agosto 21 nga nahimutang atubangang sa Mandaue City Hall isip kabahin sa mga kalihokan sa pagsaulod sa ika-56 nga tuig sa Charter Anniversary sa syudad.
Personal nga giablihan ang maong kalihokan ni Mandaue City Mayor Thadeo “Jonkie” Ouano kauban ang mga City Councilors nga sila Fritz Villamor, Eugene Andaya, Ben Basiga, Ting Sol Cabahug, Jen Del Mar, Anjong Ouano-Icalina, Kevin Cabahug V, kanhi Vice Mayor Nerissa Soon-Ruiz ug Opao Barangay Captain Nixon Jojo Dizon.
Ang mabulokong food park kay nagbaligya og nagkadaiyang pagkaon sama sa lechon de Cebu, nilarang nga bangus, barbeque, sinugba, kinilaw, ug uban pa.
Ania sab ang mga nagkalain laing desserts sama sa Korean snacks, mixed fruits shakes, puto bongbong, ug daghan pa.
Abli kini hangtod sa Agosto 29 matag alas 4 sa hapon hangtod alas 11:30 sa gabii.
Gidapit sa dakbayan ang publiko sa pagbisita sa food park ug pagtilaw sa nagkalain-laing pagkaon nga giandam sa mga local food vendors.
