Mapasalamaton ang Hepe sa Mandaue Police Station 1 nga si PMaj. Philip Libres sa nahimong maayong resulta sa kapaskohan ingun man sa Bag-ong Tuig.
2 ka adlaw ang nilabay human gisaolog ang usa sa mga dagkong selebrasyon sa nasud, ug mao ang Bag-ong Tuig, subay niini, adunay pipila ka mga natala nga mga naangol tungod sa mga pabuto.
Apan, ang Mandaue Police Station 1, malipayon gayud tungod kay wala silay natala nga mga kadaot, indiscriminate firing, mga illegal firecrackers.
Mao kini ang gikabutyag ni PMaj. Libres atol sa ekslusibong pakighinabi sa Bombo Radyo Cebu Team kaniya nga sulod sa iyahang 5 ka barangay nga gilangkoban sa area of responsibility sama sa Barangay Sentro, Barangay Guizo, Barangay Alang-alang, ug Barangay Estancia, malipayon siya bisan paman sakapuno sa ilahang schedule nga wala gayud silay natala nga mga kadaot o ba kaha mga biktima sa mga pabuto niadtong New Year’s Eve.
Apan, wala gilimod ni Libres nga adunay mga hagit usab sila nga nahimamat taliwala sa ka ligdong na sa ilahang preparasyon ug mao kini ang gikahiligan kasagaran sa mga bata—ang pagpabuto sa lantaka.
Diin mao gayud ang ilang kasagaran nga mga taho nga ilang nadawat gikan sa barangay tungod sa pagbuto sa mga bata og dagko na kayo nga lantaka.
Gani, mao kini ang ilahang gipangusgan nga miresulta sa pagkakompiska sa ubay-ubay nga gidaghanon.
