METRO MANILA-Mopahigayon ang grupo sa MANIBELA og 3 ka adlaw nga transport strike sunod semana sugod Miyerkules, Agosto 14 hangtod Agosto 16.
Kini nunot sa pahibalo ni Presidente Marcos nga magpadayon ang modernisasyon bisan pa sa resolusyon sa Senado nga suspensuhon una ang Public Transport Modernization Program.
Sa gipahigayong press conference, si MANIBELA Chairman Mar Valbuena niingon nga daw wala gibasa sa Presidente sa hingpit ang unod sa resolusyon sa senado ug wala masayod sa rason nganong gisuspenso kini.
Dugang ni Valbuena, nga wala siya masayod kon nagpakabuta-bungol ba ang Presidente tungod kay wala niya makita ang pag-antos sa mga drayber, operator, ug mga sumasakay nga apektado.
Samtang, kon bawion sa Presidente ang iyang pamahayag ug maminaw sa Senado, ilang ipahunong ang tulo ka adlaw nga transport strike ug hatagan na hinuon og libreng sakay.
