CEBU CITY – Nakahilak sa tumang kalipay ang usa ka senior citizen nga manindahay ug kandila sulod sa Basilica Minore del Santo Niño, human nga nakadawat ug hinabang gikan sa Bombo International News Correspondent.
Emosyonal nga gisaysay ni Fortunata Odto, nga dako niining pasalamat sa naghatag kaniya ug P5,000 gumikan kay iyaha kining ipuno sa pagpalit ug materyales alang sa pagtukod ug balay.
Matud pa, wala na kini bana hinungdan nga hilabihan ang iyahang paningkamot karun arun nga mabuhi kauban ang iyahang mga apo.
Giingong wala kini makatuo sa hinabang nga kalit lang naabot kaniya.
Mensahe ni Odto ngadto sa ‘good samaritan’ nga ang Balaang Bata na lang bahala sa paghatag ug dugang grasya alang niini gumikan sa pagtabang kaniya, bisan ug dili man sila kaila.
