CEBU CITY — Anaa na sa kustodiya sa kapulisan ang usa ka 50-anyos nga manlalaban human nagpost og dili beripikadong impormasyon sa internet kalabot na sa coronavirus disease (COVID-19).
Giila ang dinakpan nga si Rommel Rosito, 50 anyos, ug nagpuyo sa Brgy. Basak Pardo, dakbayan sa Sugbo.
Base sa inisyal nga imbestigasyon, gikatahong gi-post ni Rosito sa social media ang mga pangalan sa giingong natakdan og COVID-19, ingon man ang tambalanan kung asa sila nalandig hinungdan nga nasikop kini sa mga pulis kagahapon sa buntag.
Sa usa ka press statement, mibahad si Police Regional Office (PRO)-7 Director BGen. Albert Ferro nga prisuhon gyud ang kinsang magpataka og post sa mga sama niini, diin wala silay gipili nga estado sa kinabuhi.
Natanggong sa prisuhan sa PRO-7 ang maong manlalaban ug mag-atubang og kasong kalapasan sa RA 1132 o “mandatory reporting of notifiable diseases and health events of public health concern act” ug Cybercrime Prevention Act.
