Gipaambit ni Bise Presidente Sara Duterte nga ang administrasyon ni Presidente Ferdinand Marcos Jr. kay nakigkunsabo sa International Criminal Court (ICC) aron ipadakop ang iyang amahan nga si Rodrigo Duterte kalabot sa kasong crimes against humanity sa iyang dugoon nga ‘war on drugs’.
Sa iyang pakigpulong sa Free Duterte Now rally sa The Hague, si VP Duterte niinsistir nga adunay politikanhong motibo luyo sa pagdakop sa iyang amahan niadtong Marso 11 sa Pilipinas.
Gidugang pa niini nga walay igong basehan sa pagkapriso sa iyang amahan sa Scheveningen Prison sa The Hague ug ang mga akusasyon sa extrajudicial killings (EJK) gibasi lamang sa mga hungihong.
Ingon man nga ang ICC nanghilabot sa pagdumala sa Pilipinas ug adunay kaugalingon nga “agenda” aron mapadayon ang suporta ug pondo gikan sa gawas sa nasud.
Samtang, ang tigpamaba sa ICC nga si Fadi El Abdallah nagdumili sa pagkomento sa mga pahayag ni VP Duterte, nga nag-insistir nga ang ICC usa ka judicial institution ug bisan unsang isyu kinahanglan i-refer sa mga maghuhukom sa korte.
Gipasanginlan usab ni Sara Duterte si Presidente Marcos nga nagpakaaron-ingnon nga buotan sa publiko.
Dugang pa niya nga wala siyay nakita nga malampuson nga mga proyekto sa kasamtangang administrasyon.
Ang Bise Presidente padayon nga nanawagan alang sa hinanaling pagpagawas ug pagpabalik sa iyang amahan sa nasud, samtang gipahayag ang katungod sa mga Pilipino nga magdesisyon alang sa ilang nasud.
