Nagpasidaan si Presidente Ferdinand Marcos Jr. sa mga ahensya sa gobyerno nga dili mosulay sa pagsumite og bakak o dili tinud-anay nga mga report ngadto kaniya mahitungod sa mga proyekto sa gobyerno nga ilang gidumala.
Sumala ni Palace Press Officer USec. Claire Castro, gipasiugda sa Presidente nga dili gyud niya gusto nga makadawat og mga bakak nga report.
Gihimo sa Presidente ang maong pahayag atol sa usa ka miting uban sa iyang economic team sa Malacañang.
Gimando usab sa Presidente ang tanang ahensya sa gobyerno nga mosumite og mga report ngadto kaniya matag duha ka semana.
Miingon siya nga tumong niini ang masubay ang progreso sa mga proyekto ug masiguro nga kini nagpadayon sa husto nga paagi, epektibong ginahimo, ug nahuman sa gitakdang panahon.
Matod pa ni Castro, maghimo ang Palasyo og usa ka mekanismo aron masubay ug ma-verify ang katukma ug kasaligan sa mga report nga gisumite sa mga ahensya sa gobyerno.
