CEBU CITY-Gisuspenso ang duha ka barko nga nagbangga ug adunay silot depende sa resulta sa imbestigasyon.
Kini human nga di mominos 8 ka mga pasahero ug duha ka tripulante ang naangol human ang ilang fast ferry nabangga sa usa ka cargo vessel sa Mactan Channel sa Domingo, Mayo 21, 2023.
Matod sa mga pasahero nga kusog ang impact hinungdan sa pagkalabay sa mga muwebles ug kagamitan.
Nasayran nga adunay 190 ka mga hamtung nga pasahero, lima ka mga bata ug 13 ka mga tripulante sakay sa Supercat MV. St. Jhudiel ug walay natalang samdan sa Cargo Vessel LCT Poseidon.
Giklaro ni Coast Guard Insen Renan Lagare Jr., deputy commander sa Philippine Coast Guard Cebu, nga niresponde sila sulod sa usa ka oras human sa panagbangga sa usa ka barkong pampasahero ug usa ka cargo ship duol sa unang taytayan sa Mactan.
Kini ngakatin-awan gihimo agig tubag sa mga taho nga nagsugyot sa pagkalangan sa ilang tubag sa mga pasahero
Una niini, gikatahong nasagmuyo ang mga pasahero nga niabot og usa ka oras ang rescuers sa pagresponde.
Niresponde usab ang Cebu City Disaster Risk Reduction and Management Office ug ubang ahensya aron tabangan ang mga pasaherong naangol.
Sa laing bahin, padayon pa nga giimbestigahan sa Philippine Coast Guard sa Sugbo ang insidente sa kadagatan, ug gipaabot pa ang pamahayag sa kapitan, sanglit anaa pa kini sa tambalanan.
