Gisusi sa mga sakop sa Cebu City Police Office, sa pagpakig-alayon sa Cebu City Government ang ruta alang sa ipahigayong solemn procession sa Fiesta Señor karong Enero 2020.
Atol sa ocular inspection, gisubay nila ang mga agi-anan sa prusisyon gikan sa Basilica Minore del Santo Niño ug pabalik diin aduna kini gilay-on nga 6.5 kilometers.
Matud ni Kon. Dave Tumulak nga ilang ibalik ang karaang ruta sa prusisyon subay na sa hangyo sa mga deboto sa Balaang Bata.
Sugdan ang pagsuroy sa 20-feet nga karo gikan sa Basilica ug mo-agi kini sa D. Jakosalem St., Magallanes St., Borromeo Street, Leon Kilat Street, V. Rama Avenue, Fuente Osmeña Circle, ug pabalik sa simbahan.
Dugang pa ni Tumulak nga ilang hatagan og pagtagad ang mga problemang nasugakod sa inspeksyon sama lang sa naglaylay nga wires, mga kagang-kagang nga kalsada, ug uban pa.
Kini aron masiguro ang kaluwasan alang sa mga mosalmot sa prusisyon atol sa fiesta ni Señor Santo Niño.
Samtang ipatuman sa gihapon ang liquor ban atol sa prusisyon.
