CEBU CITY — Giuyunan sa usa ka political analyst ang sugyot sa China nga mopahigayon og hiniusang imbestigasyon mahitungod sa nahitabong insidente sa Recto Bank.
Kini subay na sa nahimong baruganan sa Malacañang nga mopahigayon og “friendly consultation” tali sa gobyerno sa Pilipinas ug sa buhatan sa Chinese foreign minister.
Sa pagpakighinabi sa Bombo Radyo kang Prof. Ryan Maboloc sa Ateneo De Davao University, kini nagkanayon nga mas maayo kining buhaton basta mouyon ang isig ka habig sa ipahigayong imbestigasyon aron masayud kung unsa gyud ang tinuod nga nahitabo tali sa mga Pilipinong mananagat ug mga Chinese.
Dugang pa ni Maboloc nga mas maayo kung walay gidapigan ang matag kampo sa ipahigayong konsultasyon ug pinasubay kini sa mga protocols sa managlahing nasud.
Kung mahinumduman, gi-angkon sa mga Pilipinong mananagat nga giingong gibangga sa Chinese fishing vessel ang ilang sakayang panagat niadtong Hunyo 9 sa gabii sa West Philippine Sea nga miresulta sa ilang pagkaunlod.
Apan giingong kalit lang nga milikoy ang baruganan sa kapitan sa barkong F/B Gim-Ver I human kini nakigpulong ni Agricultural Sec. Manny Piñol ug nahatagan og tabang gikan sa gobyerno sa nasud.
