CEBU CITY– Patay ang usa ka mason human kini natagakan sa nahulog nga tubo (galvanized iron pipe) samtang gatrabaho sa usa ka high-rise construction building sa Tower D, City Clou Project, Barangay Zapatera ning dakbayan sa Sugbo niadtong Martes sa udto, Hunyo 10, 2025.
Ang biktima kay giilang si julito Bacus Gerada Jr., 26-anyos ug lumad taga Barangay Biga, dakbayan sa Toledo sa kasadpang Sugbo diin matod pa nagsakay kini sa gondola sa ika-walo nga andana (8th floor) sa dihang nahitabo ang trahedya sumala pa sa mga awtoridad.
Nakaangkon og grabeng samad sa ulo ang biktima diin dali kining gidala sa tambalanan sa Vicente Sotto Memorial Medical Center (VSMMC) apan gideklarar dayon dead-on-arrival sa mga attending physician.
Sa inisyal nga pagsuta, gikatahong natagak ng maong tubo gikan sa ika-22 nga andana (22nd floor) sa wala pa kini naigo sa biktima.
Sumala pa sa Project Safety Officer nga si Marvin Gentapa nga nahitabo ang insidente pasado alas 11 sa udto ug na-report sa mga kapulisan pag alas 5:30 na sa hapon sa samang adlaw.
Sa pagkakaron, gi-inspeksyon na ang construction site diin personal pa nga gi-isyu ni Cebu City Office of the Building Official Head Architect Florante Catalan ang suspension order sa maong building human sa panghitabo.
Dugang paningkamo sa pag-imbestigar ang gibuhat karon sa mga awtoridad kalabot sa insidente ug sa posibilidad nga kung aduna bay negligence sa bahin sa tigdumala niini.
