Mikalas og 9 ka kinabuhi ang nahitabong mass shooting sa usa ka eskwelahan sa British Columbia, Canada, niadtong Martes, Pebrero 10.
Gikumpirmar sa Royal Canadian Mounted Police nga siyam ka tawo ang namatay samtang ang gidudahang gunman nakit-an usab nga wala nay kinabuhi ug ang iyang mga samad gituohan nga “self-inflicted.” Basi sa report, ang alerto naghulagway sa suspek isip usa ka babaye nga nagsul-ob og bestida ug adunay brown nga buhok.
Unom sa mga patayng lawas sa mga biktima ang nakit-an sulod sa Tumbler Ridge Secondary School, duha pa ang nakit-an duol sa usa ka residential property ug usa ang namatay samtang gidala sa ospital.
Human sa krimen, ang Tumbler Ridge Secondary School ug Tumbler Ridge Elementary School gisirhan sa tibuok semana.
Samtang, si British Columbia Premier David Eby nagpahayag sa iyang pahasubo sa mga nagbangotan nga pamilya sa mga biktima sa makalilisang nga trahedya ug nagpasalig sa suporta alang sa mga apektadong komunidad.
