Gikonsiderar nga solved case na ang massacre nga nahitabo sa usa ka bakery sa Antipolo nga mipatay sa 7 ka mga tawo, lakip ang 2 ka menor de edad, niadtong Abril 22.
Matod ni Rizal Police Provincial Office (Rizal PPO) director Col Felipe Maraggun nga nasulbad na ang kaso human ang suspek nga giilang si alyas Bogart gipasakaan og 7 counts of murder sa Office of the City Prosecutor niadtong Huwebes.
Dugang sa hepe sa Antipolo Police nga si Lt. Col Ryan Manongdo, ang suspek nisumite na sa iyang extra-judicial confession kalabot sa maong insidente.
Kasamtangang gipaabot karon sa kapolisan ang laboratory results sa suspek nga gihimo sa forensic group aron masuta kon ubos ba kini sa impluwensiya sa ilimnong makahubog o ilegal nga drugas sa dihang gihimo ang krimen.
Gipamatud-an usab sa imbestigasyon nga nag-inusarang milihok ang suspek dihang gipatay ang mga biktima pinaagi sa pagdunggab kanila.
Basi sa naunang pamahayag sa suspek kinsa usa usab sa mga tag-iya sa maong bakery, nahimo niya ang krimen tungod kay ang mga biktima giingong nagplano sa pagpatay kaniya nunot sa away nila sa pagpanag-iya sa maong bakeshop.
