CEBU CITY-Naluwas ang usa ka masuso nga gibaligya sa kantidad nga P30,000 sa inahan ug kalive-in partner niini sa Brgy. Duljo Fatima, dakbayan sa Sugbo.
Ang bata natawo niadtong Pebrero 20 sa Cebu City Medical Center (CCMC) samtang ang inahan nagpabilin sa CCMC hangtod niadtong Marso 6 tungod kay ang bata adunay mga komplikasyon.
Sa ekslusibong pakighinabi sa Bombo Radyo Cebu kang Catalina Abella, ang GAD Focal sa Cebu City Social Welfare and Services (CSWS) sa Duljo Fatima, diin ang magtiayon nasikop ug kasamtangang gitanggong sa Cebu City Jail Facility sa Barangay Kalunasan sa bukirang bahin sa dakbayan tungod sa krimen nga nahimo niadtong Marso 7, ning tuiga.
Matud ni Police Lt. Col. Maria Theresa Macatangay, deputy city director for operations sa Cebu City Police Office, nga ang magtiayon nasikop samtang nagduwa og baraha nga gitawag og tong-its gawas sa ilang balay.
Gituohan usab sa kapulisan nga ang bata gibaligya sa kantidad nga P100,000–P30,000 ngadto sa mga ginikanan, P57,000 ngadto sa middleman samtang ang nahabilin nga kantidad gigamit sa pagbayad sa tambalanan.
Ingon man nga gihimakak pa kini sa mga dinakpan ang pasangil batok kanila bisan og napamatud-ang tinuod tungod sa gihimong raid sa mga otoridad.
Apan, wala magdugay nag-imbestigar ang kapulisan ug mga sakop sa CSWS, ug ilang giangkon nga tungod sa kalisod sa kinabuhi ila kining gihimo.
Nasayran usab nga dili kini ang unang higayon nga gibaligya ang ilang anak tungod kay giingong ikaduha na kini nga higayon aron lang makakwarta.
Sa pagkakaron, ang laing 6 ka mga anak sa magtiayon kay anaa na sa kustodiya sa CSWS aron masusi og maayo ang sitwasyon nga ilang nasinati.
