CEBU CITY – Nabalik na sa iyahang inahan ang masuso nga gidagit niadtong buwan sa Pebrero sa Cebu Metropolitan Cathedral.
Nag edad na karon ug pito ka buwan ang bata kinsang anak ni Irene Capuno nga niadtong higayuna, 3 ka semana palang gikan sa paghimugso niini.
Sa interview sa Bombo Radyo Cebu kang Micah Alvaro , gibutyag niini nga dugay na siyang nagduda sa asawa sa iyahang ig-agaw nga dili iyahang anak ang gidala niini nga masuso sa ilaha. Kini human nga wala man kini nakabantay nga midako ang tiyan niini.
Nisamot usab ang iyahang pagduda sa dihang mikatap ang hulagway sa bata ug susama gyud ug dagway sa anak sa iyahang ig-agaw. Dugay matud niini nga giluom ang iyahang nahibaw-an gumikan kay wala man kini igon’g ebedensya.
Hangtud nga niadtong milabay’ng adlaw, nakahigayon kini ug estorya sa iyahang ig-agaw, apan nagkagubot lang sila ug nadapatan pa siya sa iyahang ig-agaw.
Midangop kini sa Danao Police Station ug positibo nga gi-identify sa inahan ang iyahang anak.
