Gisugyot ni Senador Panfilo “Ping” Lacson nga gamiton ang posibleng matigom nga P7 bilyon gikan sa pagkunhod sa badyet sa Senado ug sa gisugyot nga dugang badyet sa Kamara alang sa pagpangandam sa “Super El Niño” ug uban pang prayoridad sa nasud.
Matod ni Lacson, mahimong pakunhuran og P2 bilyon ang gisugyot nga badyet sa Senado alang sa 2027, gikan sa hapit P7 bilyon ngadto sa P5 bilyon.
Giawhag usab niya ang House of Representatives nga biyaan ang plano nga dugangan ang kaugalingong badyet og P5 bilyon.
Isip tsirman sa Senate Committee on Accounts, gipasiugda ni Lacson nga ang maong lakang magpakita sa maalamong pagdumala sa pondo ug disiplina sa paggasto sa gobyerno, ilabi na human ideklarar sa Korte Suprema nga supak sa Konstitusyon ang pipila ka probisyon sa nasudnong badyet alang sa 2024, 2025, ug 2026.
Gawas sa pagpangandam batok sa grabeng epekto sa “Super El Niño,” gisugyot usab nga ilaan ang matigom nga pondo sa panglawas, edukasyon, ug uban pang serbisyo publiko nga nanginahanglan og dugang suporta.
Gipasiugda usab ni Lacson ang papel sa Senado sa hugot nga pagsusi sa nasudnong badyet alang sa 2027.
