Andam nga mo-atubang sa mga reklamong giatubang si Cebu City Mayor Nestor Archival may kalabot na sa giingong pagtugot niini sa pagpadayon sa konstruksyon sa Monterrezas de Cebu project.
Gipadayag sa Chief of Staff ni Cebu City Mayor Nestor Archival nga si Kenneth Siasar nga vulnerable o dali rang pasakangan og kaso ang bisan kinsa nga naglingkod sa pampublikong buhatan, ilabi na kung nagsilbi kini sa gobyerno.
Nangatarungan si Siasar nga dili tanan ma-akomodar o malipay, tungod kay adunay mga higayon nga bisan unsa pa ka husto ang gibuhat sa usa ka opisyal, adunay gihapon mangita og sayop ug dili mouyon niini.
Gipasabot usab ni Siasar nga tungod kay kini usa ka legal nga butang, wala pa silay gihatag nga pormal o opisyal nga komunikasyon bahin sa kaso sa pagkakaron.
Dugang niya nga likayan una nila ang paghisgot sa mga merito o detalye sa kaso tungod kay kini usa pa ka bag-ong alegasyon nga mikatap sa social media ug wala pa opisyal nga gisumite sa ilang opisina pinaagi sa pormal nga dokumento.
Ang kaso nga gipasaka batok kang Archival may kalabotan na sa pakyas nga pagpagawas og cease and desist order batok sa Monterrezas de Cebu project, diin gipasanginlan kini sa giingong posibleng paglapas sa anti-graft law lakip ang Section 3E ug Section 3H sa R.A. 3019 o ang ang anti-graft and corrupt practices act ug administrative offenses.
