Gipaambit ni Cebu City Mayor Nestor D. Archival ang iyang mensahe sa pag-abli sa 2026 International Conference on Resource Sustainability (icRS 2026) gahapon, Hunyo 15, 2026.
Atol sa maong kalihokan, iyang gihatagan og gibug-aton ang mga padayong inisyatiba sa dakbayan alang sa environmental sustainability, kalig-on batok sa kalamidad, ug responsableng pagdumala sa mga natural nga kahinguhaan.
Ang maong panagtigom nagtumong sa pagtuki sa mga bag-ong solusyon alang sa mga hagit sa kalikopan ug kahinguhaan sa tibuok kalibutan.
Gisaysay ni Mayor Archival ang mga hagit nga giatubang sa Dakbayan sa Sugbo isip usa ka paspas nga nagtubo nga urban center.
Taliwala niini, iyang gipakita ang mga paningkamot sa lokal nga kagamhanan sa pagpalambo sa malungtarong kalamboan pinaagi sa mga programa sa pagpanalipod sa kalikopan, mga inisyatiba sa climate resilience, ug responsableng pagdumala sa basura ug enerhiya.
Gipasiugda usab sa mayor ang kamahinungdanon sa pagtinabangay tali sa gobyerno, mga institusyon sa akademya, pribadong sektor, ug mga komunidad aron matubag ang mga kabalaka sa kalikopan.
Ang icRS 2026 nagsilbing plataporma alang sa interdisciplinary nga diskusyon sa climate action, circular economy, renewable energy, waste management, ug water resource conservation.
