CEBU CITY — Gisugdan na ni Lapu-Lapu City Mayor Junard “Ahong” Chan ang kampanya niini aron ipahinumdom sa katawhan ang pagkamahinungdanon sa pagpuyo sulod sa balay taliwa sa COVID-19 pandemic.
Si Chan mismo ang nangunay sa pagdala sa mga porlon, kauban ang mga opisyal sa dakbayan, ug gisuroy kini ngadto sa tanang pampubliko nga lugar.
Gi-deploy sa managlahing lugar ang lima ka mga porlon nga adunay lungon ug nakabutang ang mensahe nga “Stay at home aron dili masulod sa lungon.”
Matud sa mayor nga halos napuno na ang tanang publiko ug pribadong tambalanan sa mga pasyente sa COVID-19 maong mipahimangno kini sa publiko nga dili maggawas-gawas aron dili matakdan sa virus.
Nakita usab ni Chan nga wala giseryoso sa mga Oponganon ang mga health protocols sama lang sa pagsul-ob og face mask ug uban pa bisan pa man sa subsob nga pagpahinumdom.
Isuroy ang nahisgutang mga porlon sa mga merkado sa dakbayan, sa Mactan Export Processing Zone, ug uban pang public places isip kabahin sa information dissemination sa kagamhanan sa dakbayan. (with reports by Bombo Crisle Adlawan/gn)
