LAPU-LAPU CITY– Milaum si Lapu-lapu City Mayor Jonard Ahong Chan nga suportaan siya sa konseho sa iyang mga programa para sa dakbayan ug ingon man ang iyang umaabot pa nga programa.
Kini human miyagyag ang mayor sa iyang mga nahimo sulod sa usa ka gatos (100) nga adlaw gikan nga milingkod kini isip mayor sa Lapu-Lapu atol sa iyang State of the City Address (SOCA) gahapon.
Gitino ni Chan sa dihang nahinabi sa Bombo Radyo Cebu nga misuporta man ang konseho sa iyang mga proyekto tungod kay para raman usab kini sa kaayohan, gipanghinaot lang niini nga magpadayon ang pagsuporta basta lamang sa ikaayo.
Gibutyag sa Mayor ang iyang accomplishments kung diin sukad matud pa sa iyang paglingkod, daghan na kini og nahimo. Gipasigarbo niini ang ‘libre nga serbisyo’.9 na matud pa ka mga barangay ang nakapahimos sa libreng, check-up, consultation, ibot sa ngipon, tupi, masahe, pedicure, manicure, facial ug uban pa.
Libre na usab ang late registration sa civil office ug ingon man free ang legal service.Gitutukan usab matud pa sa mayor ang drainage system ug labaw sa tanan ang construction niini sa hospital kung diin nahuman na ang unang phase ug duna nay emergency room.
Lauman usab sa mga musunod pa niya nga buwan o tuig sa termino nga matukod na ang sementeryo sa isla sa Olanggo nga libre para sa mga kabos.
Duna na matud pa libre nga lungon o 8 mil pesos nga burial assistance ang una nga gitanyag sa city government para sa mga kabos ug tumong nila karon ang tukuran na usab sa sementeryo.
Dason pa sa mayor nga aduna nay kwarta para niini– ang pagproseso nalang matud pa ang kuwang ug ang pagpalit sa luna.
Sunod usab niini ang sewerage treatment plan para sa drainage.
