CEBU CITY — Gi-angkon ni Lapu-Lapu City Mayor Junard “Ahong” Chan nga wa’y igo nga resources ang syudad alang sa paglugway pa sa Enhanced Community Quarantine (ECQ) apan wa kini magpasabot matod pa sa Mayor nga daw mag-suicide na lang gumikan sa sitwasyon.
Gihimug-atan ni Mayor Chan nga gusto na sa halos tanan nga mobalik na sa ilang panginabuhi hinungdan nga daghan ang gusto na nga mapaubos sa General Community Quarantine ang estado sa dakbayan.
Apan matod sa Mayor nga una magdeklarar sa GCQ kinahanglan nga siguro-ong luwas ang katawhan gikan sa hulga sa makamatay’ng coronavirus.
Kini ang usa sa gitumbok sa opisyal nganong nagkasabot ang pamunuan sa tulo ka dagkong dakbayan sa Sugbo nga magpabilin lang una sa Enhanced Community Quarantine (ECQ) ang naasoy’ng mga syudad.
Subay niini gibutyag sa Mayor ang ka-mahinungdanon sa nagpadayong strategic rapid test sa dakbayan aron masuta kung asa ang daghan og kaso sa COVID-19 alang sa paghatag og tabang nga malikayan na ang pagkuyanap sa virus.
Kini usab ang pama-agi aron adunay seyentipikong basehan ang makab-ot nga desisyon sa lokal nga kagamhanan sa mosunod lakang batok sa Coronavirus Disease 2019.
