MANDAUE CITY-Nawad-an og pinuy-anan ang dul-an sa 400 ka mga indibidwal human gilamoy sa miulbong sunog sa Mandaue nga niigo sa tulo ka mga purok sa dakbayan nga mao ang Alliance, Santan, ug Saging-Saging gahapong adlawa, Mayo 23, 2024.
Matud sa taho nga anaa sa 60 ka mga panimalay ang hingpit nga naugdaw ug laing duha ang partially damaged.
Daling nagpahigayon og disaster operation ug profiling sa mga apektadong pamilya sa barangay gymnasium ang Mandaue City Social Welfare and Services (CSWS).
Ug mokabat sa P280,000 ang kinatibuk-ang danyos sa sunog.
Padayon pa ang imbestigasyon sa Mandaue City Fire Office aron masuta ang hinungdan sa sunog nga naggikan sa balay sa usa ka Merced Pano Kyamko.
Subay niini, gibisita ni Mayor Jonas Cortes ang mga biktima sa sunog nga gipahiluna sa kasamtangang evacuation center sa Basak Elementary School Gym.
Uban sa City Social Welfare Services, nanghatag si Mayor Jonas Cortes og Disaster Kits aron magamit sa mga nasunogan.
Ang Disater Kits adunay sulod nga habol, banig, undergarments, hygiene kit, t-shirts, shorts ug mga nag-unang panginahanglan. Naghatag usab ang Mayor og pagkaon ug tubig alang sa mga nabiktima sa sunog.
Gimandoan ni Mayor Jonas Cortes ang CSWS sa pagproseso sa mga gikinahanglan nga rekisito alang sa paghatag og dugang pa nga tabang sa mga nasunogan sama sa financial assistance ug uban pa nga ayuda.
