Makigkita si Mayor-elect Nestor Archival sa mga tinugyanan sa Metro Cebu Water District kabahin sa gikusgon sa tubig nga mogawas sa mga fire hydrant sa dakbayan sa Sugbo.
Kini maylabut sa mga suliran kabahin sa mga fire hydrant nga iyang nasayran atol sa tigom kagahapon, Martes Hunyo 10, 2025, sa Cebu City Disaster Risk Reduction and Management Council (CCDRRMC).
Matud ni Mayor-elect Nestor Archival atol sa maong tigom nga bantayan sa MCWD ang matag fire hydrants dinhi sa siyudad nga matud pa sa MCWD, sa 392 ka mga fire hydrant sa dakbayan, 50 niini- ang adunay ray meter.
Usa sa hatagan unya og pagtagad sa administrasyon ni Mayor-elect Archival mao ang kahimtang sa tubig dinhi sa dakbayan sa Sugbo.
Matud niya, nagkinahanglan ang siyudad og 500 milyones ka litrong tubig matag adlaw; apan subay sa iyang nasayran, nga makahatag lang og 275 milyones litros ngadto sa 300 milyones litros.
Dugang usab niini nga pangitaan usab ug kasulbaran ang problema sa mga nausik nga tubig tungod sa illegal tapping, lakip na usab nga hatag pagtagad ang kasulbaran sa mga depektibo nga fire hydrant.
Ipatang-tang usab niini ang mg fire-hydrant nga anaa nahimutang sa mga suok nga bahin ug ipagawas aron usab magamit. | Bombo Nathaniel Sandoval
