CEBU CITY-Ipasusi ni Mayor Raymond Alvin Garcia ang nahitabo nga pagkatumba sa railings sa Pasil Fish Port sa Barangay Suba ning dakbayan sa Sugbo nga niresulta sa pagkamatay sa usa ka 4-anyos nga bata niadtong Lunes, Oktubre 14, 2024.
Mao kini ang gipaambit ni Mayor Garcia atol sa pagbalik sa e-bike nga gi-impound sa Cebu City Transportation Office (CCTO) nga gigamit sa paghatod sa bata ngadto sa tambalanan.
Matud pa niini nga bisan paman nga adunay kalapasan nga nabuhat ang tag-iya sa e-bike ug sa mga isyu kabahin niini jay iya kining gimando nga ibalik tungod sa humanitarian nga rason.
Gikanayon usab sa opisyal nga nanawagan kini og imbistigasyon sa Market Operations Division, ug sa Cebu City Transportation Office, kay gusto niini tan-awon kung ang gibutang nga barikada kay luwas pa ug maayo nga pagkatukod.
Gani, kung masuta nga adunay pagpabaya nga nahitabo nga niresulta sa maong insidente, ang pahamtangan og disciplinary action, lakip na ang pagkasuspenso, sa hingtungdang kawani o mga kawani.
Subay niini, gipaambit usab ni Garcia ang iyang personal nga bisitahon ang haya sa bata ug mohatag og hinabang sa pamilya.
Subay niini, nakuha na usab sa mga sakop sa Road Management Authority ang duha ka mga railings nga maoy nidat-og sa 4-anyos nga batang lalaki.
