Gidayeg ni Cebu City Mayor Edgardo Labella ang kapulisan sa Cebu City Police Office (CCPO) ug uban pang hut-ong sa otoridad gumikan sa malampusong buy-bust operation gahapon sa buntag sa Andress Abellana, Brgy. Guadalupe dakbayan sa Sugbo nga nisangpot sa pagkasikop sa tulo ka indibidwal ug pagka-sakmit sa dul-an P50 milyones nga kantidad sa gituhu-ang shabu.
Gihimug-atan sa Mayor nga bisan ug anaa pa sa gi-atubang nga pandemya, di mohunong ang dakbayan sa pakigbatok sa iligal nga drugas.
Subay niini gitahasan ni Labella si CCPO Director PCol Josefino Ligan sa paggukod sa mga padayong naglambigit sa iligal nga kalihukan sa ginadiling drugas.
Gahapon sa buntag sa dihang nasakmit sa Philippine National Police (PNP) ug sa Philippine Drug Enforcement Agency (PDEA-7) ang mokabat sa P47.6 million nga kantidad sa shabu sa malampusong buybust operation.
Giila ang mga dinakpan nga sila si Rolando Romeo, 32 anyos; Calvin Valdez, 42 anyos; ug Eduard Romeo, 24 anyos, ug pulos kini mga residente sa naasoy nga dapit.
Gihan-ay na ang kasong atubangon sa mga dinakpan, kasong kalapasan sa RA 9165 o Comprehensive Dangerous Drugs Act of 2002. /gs
