CEBU CITY-Nagkahiusa ang mga empleyado sa Cebu City Government ingon man ang mga supporters ni Mayor Michael Rama sa Plaza Sugbo grounds gahapon, Mayo 9, 2024 alang sa usa ka prayer rally.
Gihimo ang maong prayer rally isip tubag sa unom ka buwan nga preventive suspension sa mayor nga gimando sa Ombudsman kalabot sa mga reklamo sa upat ka mga empleyado sa City Hall batok kaniya ug sa ubang mga opisyal sa dakbayan.
Atol sa panagtigom, gibutyag ni Rama nga kasamtangan kining nagpaabot sa iyang appointment ngadto kang Presidente Ferdinand Marcos Jr., sa tumong nga madunggan ang iyang habig gumikan grabe ang pagguba kaniya.
Ingon man ang pagpadayag niini og kasagmuyo nga gilamoy sa hilo sa gahum nga misangpot pa sa pagkalimot sa pagkahigalaay.
Sa pikas bahin, nahinabi sa Bombo Cebu NewsTeam si Cebu City Vice Mayor Raymond Garcia nunot sa sitwasyon ni Rama gumikan mao na kini ang molingkod isip acting mayor sulod sa unom ka buwan.
Matud pa sa opisyal nga wala pa nadawat ang implementation order kalabot sa suspenso sa mayor hinungdan nga wala pa kini masayod kung kanus-a kini molingkod isip acting Mayor sa dakbayan.
Ingon man nga gipaambit niini nga nagkaistorya ang duha sa dihang migawas ang maong balita ug tubag ni Rama nga magpaabot nalang sa iluwat nga mando gikan sa DILG.
