PROVINCE OF CEBU- Kusganong gipahayag ni Mayor Amos Cabahug, Municipal Mayor sa Lungsod sa Balamban ang iyang suporta sa kampanya batok sa ilegal nga droga, dungan sa pagpahinumdom sa mga kapulisan nga kanunay unahon ang ilang kaluwasan atol sa mga operasyon.
Kini ang reaksyon sa alkalde human sa nahitabong pinusilay tali sa mga otoridad ug mga suspetsado didto sa Sitio Himombungan, Barangay Cantuod sa maong lungsod niadtong hapon sa Mayo 11, 2026, nga miresulta sa pagkamatay sa usa ka lalaki.
Nahitabo ang engkwentro atol sa usa ka hot pursuit operation batok sa mga personalidad nga giingong nalambigit sa ilegal nga kalihokan sa ginadiling druga sa maong dapit.
Gisaysay ni Mayor Cabahug nga dako ang iyang pasalamat tungod kay naluwas ang kinabuhi sa usa ka pulis human masangga sa gisul-ob nga bulletproof vest ang bala nga gipabuto sa suspek.
Gipasabot sa mayor nga nagpabiling peligroso ang pakiggubat batok sa ginadiling droga tungod kay adunay mga suspetsado nga andam mosukol ug mopatay aron lang makalingkawas sa balaod.
Tungod niini, nanawagan usab si Cabahug sa mga residente sa Balamban nga makigtambayayong sa mga otoridad pinaagi sa pag-report sa mga kaduda-duhang kalihokan sa ilang komunidad aron sumpoon ang krimen sa dili pa kini modako.
Naglaum ang maong opisyal nga magpabiling malinawon ang lungsod ug nangayo og dugang pag-ampo alang sa proteksyon sa tanang law enforcers ug mga lumulupyo.
