CEBU CITY-Gihatagan ni Cebu City Mayor Michael Rama ang kapulisan sa Dakbayan sa Sugbu ug hangtod sa Independence Day o Hunyo 12 aron wagtangon ang bandalismo, street dwellers ug maminusan ang kriminalidad o dili niya ihatag ang ilang binuwan nga allowance.
Niluwat si Rama niining pahimangno isip tubag sa sunodsunod nga pagpanulis nga bag-o lang nahitabo sa dakbayan.
Niadtong Martes, Mayo 16, usa ka babaye ang gitulis sa junction sa dalan Escario ug Clavano.
Nasikop sa kapulisan sa dakbayan ang usa sa duha ka mga suspek atol sa manhunt operation niadtong Miyerkules sa gabii, Mayo 17.
Niadtong Abril 24, 2023, usa ka lalaki usab ang gitulis sa T. Padilla Extension pagkanaog sa barko nga gikan sa Hilongos sa Leyte, kung diin ang biktima gikatahong naglakaw sa T. Padilla Extension dihang usa ka lalaki ang giingong mihunong, nition kaniya og kutsilyo, ug nihangyo nga ihatag ang iyang mga mahalong butang.
Matud sa Mayor, nga bag-o lang siyang nakigtagbo kang Police Colonel Ireneo Dalogdog diin iyang gipadangat ang iyang kabalaka sa kalinaw ug kahapsay sa dakbayan.
Kung kahinumduman nga sa hinapos nga bahin sa miaging tuig, si Mayor Rama nipahibawo sa iyang plano nga doblehon ang binuwan nga allowance sa mga polis gikan sa P2,500 ngadto sa P5,000, kay iyang gipangayo nga ilakip kini sa 2023 annual budget sa dakbayan.
