CEBU CITY-Nasagmuyo si Cebu City Councilor Jun Alcover, ang chairman sa Committee on Agriculture sa pagsupak ni Cebu City Mayor Michael Rama sa pagtangtang kang Joey Baclayon isip pangu sa Cebu City Agriculture.
Matod ni Alcover nga tataw ang mga palpak ni Baclayon ug makahatag usab kini og dili maayong imahe sa mayor.
Matod niya, onse mil ka mga mag-uuma [11,000] sa kabukiran sa dakbayan sa Sugbo ang nag-antos pag-ayo sa epekto sa El Nino phenomenon, apan karon molihok na si Baclayon, ingon man ang kagamhanan sa dakbayan.
Hinungdan nga gipahimug-atan ni Alcover nga wala makapangandam ang siyudad sa ting-init ug nisangpot nga wa masayod kon unsay buhaton sa katalagman nga nasinati karon.
Gipasalig sa konsehal nga dili siya mohunong sa pagsaway sa mga kasaypanan ni Baclayon hangtod nga makasabot si Mayor Rama nga dili komedya ang nasinati sa mga mag-uuma sa kabukiran.
