CEBU CITY — Gikumpirmar mismo ni Lapu-Lapu City Mayor Junard “Ahong” Chan nga nagpositibo kini sa coronavirus disease 2019.
Gibutyag ni Mayor Chan, atol sa exclusive interview sa Bombo Radyo Cebu, nga kagabii lang niini nakuha ang iyahang swab test result.
Matud pa nga tulo ka higayon na kini nga nagpa-rapid test apan negatibo man ang resulta niini.
Gidugang pa sa mayor nga wala man kini nakasinati ug mga sintomas sa COVID-19 apan giingong susamang mihinay ang iyahang immune system gumikan sa pagtrabaho ug kapin sa walo ka oras, ingon man ang pagduwa niini pagbalik ug lawn tennis bisan pa man ug kapoy na ang lawas gikan sa trabaho.
Giklaro sa opisyal nga negatibo man sa swab test ang iyahang pamilya, ingon man usab ang iyahang driver ug close-in securities, butang nga iyahang gikahibulong.
Apan sigon pa ni Chan nga bugtong nagpositibo sa virus mao ang iyahang backup security nga dili niini kanunay nga makauban.
Subay niini, nagduda ang mayor nga posibling nakuha niini ang maong virus sa iyahang backup security human nga dili malikayan nga sila magkaabot usab panahon kung sila mangaon.
Sa pagkakarun, anaa sa isolation room sulod mismo sa iyahang panimalay si Mayor Chan, samtang gi-monitor ang dagan sa iyahang panglawas. (sbr)
