PROVINCE OF CEBU- Nasikop sa mga sakop sa Criminal Investigation and Detection Group-Regional Field Unit (CIDG-7) ug Talisay City Police ang usa ka block timer ug kandidato pagka mayor sa dakbayan sa Talisay, Cebu human gilusad ang entrapment operation sulod sa usa ka mall sa maong Dakbayan.
Ang dinakpan giila nga si Roger Cimafranca ug gipasanginlan nga nangilkil kang Talisay City Mayor Gerald Anthony “Samsam” Gullas og P500,000 aron pag-withdraw sa iyang kandidatura sa umaabot nga 2025 Midterm Elections.
Sa eksklusibong pakighinabi sa Bombo Radyo Cebu kang Cimafranca diin iyang gihimakak ang pasangil batok kaniya ug nagkanayon nga managhigala gihapon sila ni Mayor Gullas.
Dugang pa, nga posibling gigamit lang kini nga paagi aron madaot siya sa umaabot nga piniliay tungod kay modagan man siya sa pagka mayor sa Talisay City, Cebu.
Gisaysay niini, nga niadtong kataposang semana sa Oktubre gikataho nga adunay usa ka mayor sa Probinsiya sa Sugbo ang nanawag kaniya aron i-withdraw ang iyang kandidatura pagka mayor sa Talisay City, apan nibalibad siya.
Miinsister si Cimafranca nga wala siya mangayo, apan gitanyagan siya og kuwarta aron maka-file og withdrawal sa iyang kandidatura.
