CEBU CITY – Naka-heightened alert karun ang Mactan-Cebu International Airport subay sa nahitabung Basilan bombing.
Sa pakighinabi sa Bombo Radyo kang Atty Steve Dicdican, ang general manager sa MCIA, gibutyag niini nga ang nahisgutang lakang ang direktiba gikan sa opisina ni DOTr Secretary Arthur Tugade kung diin mas gipahugtan pa nila ang gihimung inspeksyon sa tanang mga pasahero sa tugpahanan.
Matud ni Dicdican nga nagpagawas kini ug kamandu-an kung diin gikinahanglan ang ‘full manning security’ sa tanang mga security personnel arun nga masiguru ang kaluwasan sa publiko.
Gihimug-atan niini nga gikinahanglan nga iprayoridad ang kaluwasan sa publiko ug protektaran kini gikan sa hulga nga sa mga grupu sa terorista ug uban pang organisasyon pinaagu sa pagsunud sa mas hugut nga mga lakang sa seguridad sa ilahang tagsa-tagsa ka mga areas of responsibilities.
Subay niini, nangayu ug despensa si Dicdican sa mga pasahero nga nahasul sa ilahang gihimung lakang.
Gisiguru ni Dicdican nga temporaryo lang ang lakang nga ilahang gipahigayun arun nga luwas ang publiko sa bisan unsa mang hulga.
