CEBU – Gikinahanglan na nga adunay mga security camera ang mga establisemento nga negosyo sa dakbayan sa Mandaue, arun malikayan ang sanctions.
Apan, ubay-ubay niining mga establisemento wala nag-ayo sa ilang mga security camera, ug ang kadaghanan niini nga mga camera nadaot sa dihang miigo ang Super Typhoon Odette niadtong Disyembre 16, 2021.
Kini ang gibutyag ni Police Lieutenant Colonel Franco Rudolf Oriol, deputy city director for operations sa Mandaue City Police Office, nga ila kining nadiskobrehan atol sa bag-ohay nga mga inspeksyon nga ilang gihimo sa mga dagkong establisemento sama sa mga malls, bangko, pawnshop, terminal sa mga pasahero, ug mga department store.
Ang imbentaryo sa MCPO kabahin sa ilang pagpangandam sa seguridad sa Pasko.
Matod ni Oriol nga tungod kay aduna nay ordinansa nga nag-require sa pagbutang og closed circuit television (CCTVs) sa mga establisemento, kinahanglang tumanon kini sa mga negosyo aron malikayan ang silot.
Dugang pa, nga ang pagbaton og CCTV usa usab ka crime deterrence, Kon aduna nay krimen nga nahitabo, seguradong makatabang sa ilang imbestigasyon sa kaso ang pagkabaton sa CCTV footages.
